நான் பார்த்தவரையில், பழகியவரையில்....பகவான் கிருஷ்ணரை பிடிக்கிறவர்களுக்கு, இன்று பிறந்த நாளை கொண்டாடுகிறவரையும் பிடிக்கிறது. சிலர் நெக்குருகிப் போவதை பார்த்திருக்கிறேன். எனக்கு எப்போதும் அவரை பிடித்ததே இல்லை. அந்த வகையில் கிருஷ்ணரும் எனக்கு தூரம்தான்.
புள்ளி விலகி நின்று யோசித்தால், இந்த இருவருக்கும் நிறைய ஒற்றுமைகள் இருக்கின்றன. குஜராத்திகள் என்பதில் துவங்கி, தாங்கள் நினைத்தவற்றை சாதிக்க உலகில் உள்ள அத்தனை அதர்ம வழிகளையும் பயன்படுத்துகிறவர்கள்.
நேர்மையற்றவைகளை தர்மம் என சப்பைகட்டு கட்டுவதில் இருவருமே கை தேர்ந்தவர்கள். அவற்றை பெரும்பான்மையினர் நம்புவதும், வழிபடுவதும் என் வரையில் சலிப்பூட்டும் நிதர்சனங்கள். இருவருக்குமே கர்ணன்களை பிடிப்பதில்லை. நண்பர்களுக்காக எதையும் செய்யக்கூடியவர்கள்....தேரோட்டுவதாகட்டும், தேசத்தை விற்பதாகட்டும் நண்பர்களுக்கு இவர்கள் செய்யும் கைமாறுகள் நிகரில்லாதவை.
தாய்மார்களை கொண்டாடும் இவர்களுக்கு, மனைவி என்பவள் எப்போதும் இரண்டாம்பட்சம்தான். ராதைகளைப் பற்றி இதற்கு மேல் பேசினால் களேபரமாகி விடுமென்பதால் இந்தமட்டோடு இதிலிருந்து விலகிப் போவோம்.
நிர்வாகத் திறமை என்று வரும்போது, இவர்களைப் பொறுத்தவரையில் அதொரு மாயத்தோற்றம். "இருக்கும் ஆனால் இருக்காது" ரகம்தான். ஆனாலும் இன்றளவும் உலகின் மிகச்சிறந்த "ஈவண்ட் மேனேஜர்ஸ்" இவர்கள்தான்.வாயாலே வடை சுடுகிறவர்கள் என்று கேலி பேசுவதை விட, வசீகர பேச்சுக்காரர்கள் என ஒப்புக்கொள்ளத்தான் வேண்டும்.
கிருஷ்ணரின் கடைசி நாட்கள் அவ்வையின் "சூதும் வாதும் வேதனை செய்யும்" என்பதையொட்டியே இருந்தது. அதனால் இவராவது, இனியாவது இது நாள் வரையிலான தவறுகளை எல்லாம் திருத்திக்கொள்வாரென நம்புவோம். அதற்காக எல்லாம் வல்ல இயற்கையை வேண்டுவோம்.
இனிய பவளவிழா பிறந்த நாள் வாழ்த்துக்கள் சார். 🙏